நாம் விரும்பி சாப்பிடும் ஐஸ்கிரீமில் துணி துவைக்கும் சலவை தூள் கலக்கப்படுவதாக அதிர்ச்சி தகவல் வெளியாகியுள்ளது.
பெயரைச் சொன்னாலே பிடித்துவிடும் உணவுகளில் ஐஸ்கிரீம் முதன்மை இடத்தை பிடித்திருக்கிறது. குழந்தைகள் முதல் பெரியவர்கள் வரை, ஐஸ்கிரீம் பிடிக்காதவர்களே இருக்க மாட்டார்கள். அடிக்கும் வெயிலுக்கு நாளெல்லாம் நாக்கைச் சுழற்றி ஐஸ்கிரீமைச் சாப்பிட்டுக் கொண்டிருந்தாலும் வெப்பம் குறையாது போலிருக்கிறது. பெரியவர்களுக்கே இந்த நிலை என்றால், குழந்தைகள் அழுது அடம்பிடித்தாவது ஐஸ்கிரீமை வாங்கித்தரச் சொல்லிச் சாதித்துவிடுவார்கள்.
மக்களின் இந்த மனநிலையைப் புரிந்துகொண்ட உணவு தயாரிப்பு நிறுவனங்கள், பல்வேறு ரகங்களிலும் சுவைகளிலும் ஐஸ்கிரீமை தயாரித்து விற்பனை செய்து வருகின்றன. தற்போது காசுக்கேற்ற அளவில் கிடைப்பதால், கிட்டத்தட்ட அனைவரும் ஐஸ் சாப்பிடுகிறார்கள். ஆனால், ஐஸ்கிரீம் என்ற பெயரில் நாம் சாப்பிடும் பொருள், உண்மையில் ஐஸ்கிரீம்தானா..?
கர்நாடக மாநிலம் பெங்களூருவில் சுமார் 200-க்கும் மேற்பட்ட ஐஸ்கிரீம் மற்றும் குளிர்பான உற்பத்தி நிறுவனங்கள் செயல்பட்டு வருகின்றன. தற்போது இந்நிறுவனங்களில் நடத்தப்பட்ட அதிரடி சோதனையில், 97 நிறுவனங்களில் தயாரிக்கப்படும் ஐஸ்கீரிம் மற்றும் குளிர்பானங்கள் தரமற்ற மற்றும் சுகாதாரமற்ற நிலையில் இருப்பது கண்டறியப்பட்டுள்ளது. சில உற்பத்தி நிறுவனங்கள் ஐஸ்கிரீமில் கிரீம்களை உருவாக்குவதற்காக துணி துவைக்கும் சலவை தூளை கலக்கின்றன.
அதேபோல், குளிர்பானங்களில் நுரையை அதிகரிக்க பாஸ்போரிக் அமிலத்தை பயன்படுத்தி வந்தது சோதனையில் கண்டறியப்பட்டுள்ளது. மேலும், ஐஸ்கிரீம் தயாரிப்பு செலவை குறைப்பதற்காக யூரியா உள்ளிட்ட பொருட்களில் தயாரிக்கப்பட்ட செயற்கை பாலை பயன்படுத்துகின்றனர். சர்க்கரைக்கு பதிலாக சுவை மற்றும் நிறத்தை மேம்படுத்த சாக்ரின் மற்றும் சாயக் கலவைகளையும் கலப்பதாக அதிர்ச்சி தகவல் வெளியாகியுள்ளது.
மேலும், பல உற்பத்தி நிறுவனங்கள் குடிக்கவே தகுதியற்ற தண்ணீரை பயன்படுத்தி ஐஸ்கிரீம் மற்றும் குளிர்பானங்கள் தயாரிக்கின்றனர். இந்த ஐஸ்கிரீமை சாப்பிடும்போது தொண்டை, உணவுக் குழாய், வயிற்று புண்கள் ஏற்படும் அபாயம் உள்ளது. அதேபோல், இருமல், சுவாசப் பிரச்சனைகளை ஏற்படுத்தக்கூடும். சிறுநீரகம் மற்றும் கல்லீரல் பாதிக்கப்படும் ஆபத்தும் உள்ளதாக மருத்துவ நிபுணர்கள் எச்சரித்துள்ளனர். இதைப்போல பாஸ்போரிக் அமிலம் கலக்கப்படும் குளிர்பானங்களால் எலும்பு வலுவிழக்க கூடும் என்றும் தெரிவித்துள்ளனர்.
