சேலம் மாவட்டம் தேவூரை அடுத்த அண்ணமார் கோவில் பகுதியைச் சேர்ந்தவர் லட்சுமணன் (வயது 42). இவர், எடப்பாடி அருகே ஆலச்சம்பாளையம் புறவழிச்சாலையில் பேக்கரி கடை நடத்தி வருகிறார். இவரது பேக்கரியில் திருச்சி மாவட்டம் மணப்பாறை பகுதியைச் சேர்ந்த ரவி (37), டீ மாஸ்டராக வேலைபார்த்து வருகிறார்.
இந்நிலையில், நேற்று மாலை ஆலச்சம்பாளையம் பகுதியைச் சேர்ந்த விசைத்தறி தொழிலாளியான மகாராஜன் என்பவர் லட்சுமணனின் பேக்கரிக்கு டீ குடிக்க வந்துள்ளார். அப்போது, அவர் வாங்கிய டீயில் சர்க்கரை குறைவாக இருப்பதாக கூறி டீ மாஸ்டர் ரவியிடம் கூடுதலாக சர்க்கரை போடும்படி கேட்டுள்ளார்.
இதில் ஏற்பட்ட வாக்குவாதம் கைகலப்பாக மாறிய நிலையில், மகாராஜன் மீது டீ கொட்டியதாக கூறப்படுகிறது. இதனால் ஆத்திரம் அடைந்த மகாராஜனின் உறவினர்கள் அங்கு கும்பலாக திரண்டு வந்து சம்பந்தப்பட்ட பேக்கரியை அடித்து நொறுக்கினர். இந்த மோதலில் காயம் அடைந்த மகாராஜன் மற்றும் டீ மாஸ்டர் ரவி ஆகியோர் மருத்துவமனையில் சிகிச்சைக்காக அனுமதிக்கப்பட்டுள்ளனர். இச்சம்பவம் குறித்து வழக்குப்பதிவு செய்த எடப்பாடி போலீசார், விசாரணை மேற்கொண்டு வருகின்றனர்.
Read More : பான் கார்டு வைத்திருப்பவர்கள் கண்டிப்பா இந்த விஷயங்களை தெரிஞ்சிக்கோங்க..!!
