பிரபாகரனுடன் சீமான் சேர்ந்து இருப்பது போன்ற புகைப்படத்தை எடிட் செய்ததே நான் தான் என்று கூறிய சங்ககிரி ராஜ்குமாருக்கு நாம் தமிழர் கட்சியினர் மிரட்டல் விடுப்பதாக கூறப்படுகிறது.
நாம் தமிழர் கட்சியின் ஒருங்கிணைப்பாளர் சீமான் இலங்கையில் பிரபாகரனை ஈழந்து போரின் போது சென்று சந்தித்து ஆமைக்கறி உள்ளிட்டவற்றை சாப்பிட்டு வந்ததாக பேசியதை பல தரப்பிலிருந்தும் கேலி செய்து வருகின்றனர். இந்நிலையில் சமீபத்தில் கட்சியிலிருந்து விலகிய இயக்குனர் சங்ககிரி ராஜ்குமார், நான் தான் சீமான் பிரபாகரனோடு உள்ளது போன்ற போட்டோவை எடிட் செய்தேன் என கூறியது மேலும் சர்ச்சை ஏற்படுத்தியது. இதுமட்டுமல்லாமல், சமீப நாட்களாக பெரியார் குறித்து சீமான் பேசிவருவது, பெண் செய்தியாளரிடம் தகாத வார்த்தையில் பேசிய என பல்வேறு சர்ச்சையை கிளப்பியுள்ளது.
இந்நிலையில், நாம் தமிழர் கட்சியின் தலைமை ஒருங்கிணைப்பாளர் சீமான், விடுதலைப் புலிகள் தலைவர் பிரபாகரன் உடன் இருக்கும் புகைப்படத்தை எடிட் செய்ததாகக் கூறியதால் நா.த.க-வினர் போன் மூலம் மிரட்டல் விடுப்பதாக இயக்குநர் சங்ககிரி ராஜ்குமார் கூறியிருப்பது பரபரப்பை ஏற்படுத்தியுள்ளது. இது குறித்து இயக்குநர் சங்ககிரி ராஜ்குமார் தனது எக்ஸ் பக்கத்தில் குறிப்பிடுகையில், “அண்ணனின் தம்பிகளுக்கு வணக்கம்.
கடந்த நான்கு ஐந்து நாட்களாக என் அலைபேசிக்கு நேரடியாகவும் வாட்ஸ் அப் மூலமாகவும் தொடர்ந்து அழைத்துக் கொண்டே இருக்கிறீர்கள். அழைப்பை எடுத்தால் வீட்டில் இருக்கும் பெண்களை வசை பாடுகிறீர்கள் அல்லது மிரட்டுகிறீர்கள். அதற்காக அச்சப்பட்டு கொண்டு இந்த பதிவை எழுதவில்லை. கசப்பை சுவைத்த உங்கள் நாவிற்கு இந்த ஆபாச வார்த்தைகள் தான் ஆறுதல் தரும் என்றால் பேசிவிட்டு போங்கள். இடையிடையே டேய்..சங்ககிரி ராஜ்குமார் நீ எந்த ஊர் காரன்டா என்று கேட்டு சிரிப்பும் மூட்டுகிறீர்கள்.
உங்கள் அச்சுறுத்தலுக்கோ.. ஆபாச வசவுகளுக்கோ நான் கவலைப்படவில்லை. உங்களிடம் வைக்கும் வேண்டுகோள் ஒன்றே ஒன்றுதான். எனக்கு அழைப்பதற்கு முன்பாக உங்கள் முகப்பு படமாக வைத்திருக்கும் தலைவர் பிரபாகரன் படத்தை நீக்கிவிட்டாவது அழையுங்கள். வீரம் நிறைந்த அவர் புகைப்படத்தை கண்களில் பார்த்துக் கொண்டே, காதுகளில் உங்கள் அழுக்கு வார்த்தைகளை கேட்பதற்கு அருவருப்பாக இருக்கிறது. உலகே கண்டு வியந்த ஒரு ஒப்பற்ற தலைவரை முடிந்த வரை இழிவு செய்து விட்டீர்கள், இனியேனும் விட்டு விடுங்கள்” என்று தெரிவித்துள்ளார்.
