ஆற்றில் குளிக்கச் சென்ற 8 இளைஞர்கள் சடலமாக மீட்கப்பட்ட சம்பவம் கோதாவரியில் பெரும் பரபரப்பையும், சோகத்தையும் ஏற்படுத்தியுள்ளது.
ஆந்திர மாநிலம் காக்கிநாடா அருகே உள்ள ஷெரிலங்கா என்ற இடத்தில் ஒரு துயரச் சம்பவம் நடந்துள்ளது. கடந்த செவ்வாய்க்கிழமை அன்று ஒரு வீட்டில் நடந்த நிகழ்ச்சியில் கலந்து கொண்ட 11 இளைஞர்கள், மதிய உணவுக்குப் பிறகு அருகில் இருந்த கவுதமி கோதாவரி ஆற்றில் குளிக்கச் சென்றனர். இந்த இளைஞர்கள் 14 முதல் 20 வயதுக்குட்பட்டவர்கள் ஆவர். அவர்கள் காக்கிநாடா, மந்தவேடு, போலாவரம் ஆகிய பகுதிகளைச் சேர்ந்தவர்கள்.
இந்நிலையில், ஆற்றில் இறங்கி விளையாடிக் கொண்டிருந்தபோது, அவர்களில் ஒருவர் எதிர்பாராதவிதமாக ஆற்று வெள்ளத்தில் அடித்துச் செல்லப்பட்டார். அவரை காப்பாற்றுவதற்காக மற்றவர்களும் பின்தொடர்ந்து ஆற்றுக்குள் இறங்கினர். துரதிர்ஷ்டவசமாக, அப்படிச் சென்ற 8 இளைஞர்களும் வெள்ளத்தில் அடித்துச் செல்லப்பட்டு நீரில் மூழ்கி உயிரிழந்தனர். அதிர்ஷ்டவசமாக, அவர்களில் 3 பேர் பத்திரமாக கரைக்குத் திரும்பி வந்தனர்.
இதையடுத்து, கரைக்குத் திரும்பிய இளைஞர்கள் அளித்த தகவலின் பேரில், போலீசார், பேரிடர் மீட்பு குழுவினர், தீயணைப்பு படையினர், பெற்றோர்கள் மற்றும் உறவினர்கள் உடனடியாக சம்பவ இடத்திற்கு விரைந்து சென்றனர். தீயணைப்புப் படையினர் ஆற்றில் இறங்கி தேடுதல் பணியில் ஈடுபட்டனர். இந்த தேடுதல் பணியில், 7 இளைஞர்களின் உடல்கள் சடலமாக மீட்கப்பட்டன. ஆனால், காக்கிநாடாவைச் சேர்ந்த 19 வயதான கிராந்தி மானியுவல் என்பவரது உடல் மட்டும் உடனடியாகக் கிடைக்கவில்லை.
அதன் பிறகு, மீண்டும் தேடுதல் பணி தீவிரப்படுத்தப்பட்டது. அப்போது, காணாமல் போன கிராந்தி மானியுவலின் உடலும் மீட்கப்பட்டது. இந்த 8 இளைஞர்களின் உடல்களும் மாமிடிவரம் அரசு மருத்துவமனைக்குக் கொண்டு செல்லப்பட்டு, பிரேதப் பரிசோதனை செய்யப்பட்டன. அதன் பின்னர், உறவினர்களிடம் உடல்கள் ஒப்படைக்கப்பட்டன. இந்தச் சம்பவம் குறித்து போலீசார் வழக்கு பதிவு செய்து தொடர்ந்து விசாரணை நடத்தி வருகின்றனர்.
