ஊழியர்களின் வருங்கால வைப்பு நிதியான பி.எப்., கணக்கில் அவசர காலத்தில் எளிதாக பணம் எடுக்கும் வகையில் பி.எப்.3.0 என்ற புதிய வசதியை கொண்டு வர திட்டமிட்டுள்ளதாக தகவல்கள் வெளியாகியுள்ளது.
எதிர்கால தேவைகளுக்காக ஒவ்வொருவரும் வேலை செய்யும் இடங்களிலும் PF பணம் சேமிக்கப்படுகிறது. ஊழியர் வருங்கால வைப்பு நிதி (EPFO) ஓய்வூதிய சேமிப்பு திட்டத்தின் மூலமாக ஊழியர்கள் பெறும் சம்பள தொகையில் இருந்து ஒவ்வொரு மாதமும் ஒரு பகுதி முதலீடு செய்யப்படும். அத்துடன் ஊழியர்கள் பணிபுரியும் நிறுவனத்தில் இருந்து ஒரு தொகை இந்த கணக்கில் டெபாசிட் செய்யப்படும். இந்த தொகையை ஒவ்வொரு ஊழியர்களும் ஓய்வு பெறும் போது எடுத்துக் கொள்ளலாம்.
ஓய்வுக்கு முன்பாக ஊழியர்கள் இந்த பணத்தை மருத்துவ செலவுகள், கல்வி, வீட்டுக் கடன்கள், திருமணம், வீடு கட்டுதல் போன்ற அவசர தேவைகளுக்கு முன்பாகவே எடுத்து கொள்ளலாம். சில நிபந்தனைகளுடன் இந்த பணத்தை பெற்றுக்கொள்ளும் வசதி உள்ளது. மருத்துவ அவசரம் மற்றும் உயிருக்கு ஆபத்தான சூழ்நிலையில் இருக்கும் போது PF உறுப்பினர்கள் சில நிபந்தனைகளுடன் ரூ. 1 லட்சம் வரை தொகையை பெற முடியும்.
இந்நிலையில் ‘பி.எப் 3.0’ திட்டத்தின் மூலமாக தொழிலாளர்களின் வருங்கால வைப்பு நிதி கணக்கில், கூடுதல் வசதிகளை ஏற்படுத்தப்பட உள்ளதாக தகவல்கள் வெளியாகியுள்ளது. அதன்படி, தொழிலாளர்கள் செலுத்த வேண்ட்டிய தொகைக்கான உச்ச வரம்பு நீக்கப்படவுள்ளது. இதனால் தொழிலாளர் விரும்பினால் பி.எப். கணக்கில் கூடுதலாக பணத்தை சேமிக்கலாம். தற்போது பி.எப். கணக்கில் மாத ஊதியத்தில் தொழிலாளர் மற்றும் நிர்வாகம் சார்பில் சரிசமமாக 12 சதவீதம் பணம் செலுத்தப்பட்டு வருகிறது.
இந்நிலையில் பி.எப். கணக்கில் தொழிலாளர் 12 சதவீதத்துக்கு கூடுதலான தொகையை சேமித்தாலும், நிர்வாகம் சார்பாக செலுத்தப்படும் 12 சதவீத தொகையில் எந்த மாற்றமும் இருக்காது. மேலும், பி.எப். கணக்குக்கு, வங்கியில் வழங்கப்படுவதை போல் ‘டெபிட் கார்டு’ வழங்க திட்டமிடப்பட்டு இருப்பதாக கூறப்படுகிறது.
பி.எப். தொகையில் ஒரு குறிப்பிட்ட பகுதியை திரும்ப பெற விண்ணப்பித்து ஏ.டி.எம்மில் அந்த தொகையை எடுத்துக் கொள்ளலாம். இ.பி.எப்.ஓ. அடுத்தாண்டு துவக்கத்தில் பி.எப். கணக்கை நிர்வகிப்பதில் கொண்டு வரப்படும் மாற்றங்கள் குறித்து அதிகாரப்பூர்வமாக அறிவிக்கும் என கூறப்படுகிறது. அத்துடன் பி.எப்., கணக்கில் இருந்து ஏ.டி.எம்., மூலம் பணத்தை எடுத்துக் கொள்ளும் புதிய வசதி அடுத்தாண்டு மே அல்லது ஜுன் மாதத்தில் அறிமுகப்படுத்தப்படும் என்று தெரிகிறது.
‘பி.எப் 3.0’ திட்டத்தின் மூலமாக இனி ஊழியர்கள் தங்களது விருப்பப்படி தங்களுடைய கணக்கில் கட்டுப்பாடுகள் இன்றி பணத்தை டெபாசிட் செய்து சேமிக்கலாம். அத்துடன் அவசர காலத்தில் பணத்தை எளிதாக எடுப்பதற்கு இந்த அம்சம் பெரிதும் உதவிக்கரமாக இருக்கும் என்பது குறிப்பிடத்தக்கது.
