100 நாள் வேலைத் திட்டம் என்று அழைக்கப்படும் மகாத்மா காந்தி தேசிய ஊரக வேலைவாய்ப்பு உறுதித் திட்டத்தின் கீழ் கிராமப்புற வேலைவாய்ப்பு நடப்பு ஆண்டின் முதல் பாதியில் 16 சதவீதம் குறைந்துள்ளதாக சில ஊடகங்கள் செய்தி வெளியிட்ட நிலையில் மத்திய ஊரக வளர்ச்சி அமைச்சகம் அதை மறுத்து விளக்கம் அளித்துள்ளது.
கடந்த 2006 ஆம் ஆண்டு கிராமப்புற மக்களுக்கு வேலைவாய்ப்பு வழங்கும் நோக்கில் மகாத்மா காந்தி ஊரக வேலை உறுதி திட்டம் கொண்டுவரப்பட்டது. இது 100 நாள் வேலை வாய்ப்பு திட்டம் என்று அழைக்கப்படுகிறது. இதன்மூலம் நாடுமுழுவதும் 6 கோடிக்கும் மேலான மக்கள் பயனடைந்து வருகின்றனர். இந்த திட்டம் கடந்த 2008 ஆம் ஆண்டு முதல் நாடு முழுவதும் விரிவுபடுத்தப்பட்டது. ஊரக பகுதிகளில் ஒவ்வொரு குடும்பத்தில் இருந்தும் ஒரு நபருக்கு 100 நாட்களுக்கு வேலை வழங்குவதை இந்த திட்டம் உத்தரவாதம் அளிக்கிறது.
கிராம பஞ்சாயத்துகள் தான் வேலை வழங்கும் பணிகளை மேற்கொண்டு வருகின்றன. 18 வயது பூர்த்தியான திறன் சாரா உடல் உழைப்பு கோரும் வேலை செய்ய விரும்புவோர் 100 நாள் வேலை திட்டத்தில் இணைந்து பணியாற்ற முடியும். அதற்கு தேவை ஆதார் கார்டு மட்டுமே.. ஆதார் கார்டு மூலம் இணைந்து ஒவ்வொரு மாதமும் கணிசமான வருமானத்தை ஈட்டஅரசே வழிவகை செய்கிறது. இந்த திட்டத்தில் நாடு முழுவதும் 13.16 கோடி பேர் பயன்பெற்று வருகிறார்கள். தமிழகத்தை பொறுத்தமட்டில் 89 லட்சத்து 70 ஆயிரத்து 166 பேர் பெயன்பெற்று வகிறார்கள்.
இது நாட்டின் கிராமப்புறங்களில் உள்ள குடும்பங்களின் வாழ்வாதாரப் பாதுகாப்பை மேம்படுத்துவதை நோக்கமாகக் கொண்டுள்ளது. 2006-07 நிதியாண்டு முதல் 2013-14 நிதியாண்டு வரை உருவாக்கப்பட்ட மொத்த மனித வேலை நாட்கள் 1660 கோடியாக இருந்தது. அதேசமயம், 2014-15 நிதியாண்டு முதல் 2024-25 நிதியாண்டு வரை மொத்த மனித வேலை நாட்கள் 2923 கோடியாக இருந்தது. 100 நாள் வேலைத் திட்டம் தேவை சார்ந்த திட்டம் என்பதாலும், நடப்பு நிதியாண்டு நடைமுறையில் இருப்பதாலும், மனித வேலை நாட்கள் உருவாக்கம் குறித்த சரியான இலக்கை நிர்ணயிப்பது சாத்தியமில்லை. இருப்பினும், மாநிலங்கள் / யூனியன் பிரதேசங்கள் உள்ளூர் தேவைகளுக்கு ஏற்ப தொழிலாளர் நிதி ஒதுக்கீட்டுத் திருத்தத்திற்கான முன்மொழிவை அனுப்பலாம்.
100 நாள் வேலைத் திட்டத்தில் நேரடிப் பணப் பரிமாற்றத் திட்டத்தின் கீழ், தொழிலாளர்களுக்கான அனைத்து பணமும் தொழிலாளர்களின் கணக்குகளில் வரவு வைக்கப்பட வேண்டும். ஆதார் அடிப்படையிலான பணப்பரிமாற்றம் என்பது ஒரு பெரிய சீர்திருத்த செயல்முறையாகும். இதில் தொழிலாளர்களின் ஆதாரின் அடிப்படையில் பலன்கள் நேரடியாக வங்கிக் கணக்குகளில் வரவு வைக்கப்படுகின்றன. 26.10.2024 நிலவரப்படி, 13.10 கோடி தொழிலாளர்களுக்கு ஆதார் இணைப்பு செய்யப்பட்டுள்ளது. இது மொத்த செயலில் உள்ள தொழிலாளர்களில் 99.3 சதவீத ஆகும்.
வேலை அட்டை சரிபார்ப்பு என்பது மகாத்மா காந்தி ஊரக வேலை உறுதித் திட்டத்தின் கீழ் ஒரு தொடர்ச்சியான செயல்முறையாகும். இந்த நடைமுறை மாநிலங்கள் / யூனியன் பிரதேசங்களால் ஆதார் எண்ணின் உதவியுடன் நடத்தப்படுகிறது. போலி வேலை அட்டை, வேலை செய்ய விருப்பமில்லாத குடும்பம், கிராம பஞ்சாயத்திலிருந்து நிரந்தரமாக மாறிய குடும்பம் போன்ற காரணங்களில் உரிய சரிபார்ப்புக்குப் பிறகு அட்டையை ரத்து செய்யலாம்.
என்எம்எம்எஸ் செயலியை ஆதரிக்கும் ஸ்மார்ட்போன்கள் இல்லாத கிராமங்களில் ஊரக வேலை உறுதித் திட்டப் பணிகள் மேற்கொள்ளப்படுவதில்லை என்பது ஒரு தவறான வாதம் என்று அரசு தரப்பில் கூறப்பட்டுள்ளது. என்எம்எம்எஸ்-ன் அறிமுகம் மாநிலங்கள், யூனியன் பிரதேசங்களில் மகாத்மா காந்தி தேசிய ஊரக வேலைவாய்ப்பு உத்தரவாதத் திட்டத்தை செயல்படுத்துவதில் மேம்பட்ட வெளிப்படைத்தன்மையைக் கொண்டு வந்துள்ளது.
இந்தநிலையில், மகாத்மா காந்தி தேசிய ஊரக வேலைவாய்ப்பு உறுதித் திட்டத்திற்கான நிதி ஒதுக்கீடு அதிகரித்து வருகிறது. 2013-14 நிதியாண்டில் வரவு-செலவுத் திட்ட மதிப்பீட்டில் ரூ.33,000 கோடியாக இருந்தது. இது நடப்பு 2024-25 நிதியாண்டில் ரூ.86,000 கோடியாக உள்ளது. இது இத்திட்டம் தொடங்கப்பட்டதிலிருந்து மிக உயர்ந்த நிதி ஒதுக்கீடாகும். மாநிலங்களுக்கு நிதி விடுவிப்பது என்பது ஒரு தொடர்ச்சியான செயல்முறையாகும். மேலும் களத்தில் பணிகளுக்கான தேவைக்கேற்ப திட்டத்தை செயல்படுத்துவதற்காக மாநிலங்களுக்கு நிதி வழங்க, மத்திய அரசு உறுதிபூண்டுள்ளதாக ஊரக வளர்ச்சி அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது.
